ДАНІЛОВІЧ ІГНАТ (1787-1843 гг., Беласточчына) – адзін з першых даследчыкаў заканадаўчых і летапісных помнікаў Беларусі, крыніцазнавец. Скончыў Віленскі універсітэт (1812), выкладаў права.

У 1830-1835 гг. працаваў у Пецярбургу ў камісіі па падрыхтоўцы збору мясцовых законаў заходніх губерняў. Упершыню апублікаваў Статут Вялікага княства Літоўскага 1529 г., Беларуска-літоўскі летапіс 1446 г. і інш. Працы «Пра літоўскія летапісы» і «Паведамленне пра сапраўдныя літоўскія летапісы» далі пачатак навуковаму даследаванню беларуска-літоўскага летапісання. У двухтомнай «Скарбніцы грамат...» апісаў, пераказаў змест і апублікаваў каля 2 400 розных пісьмовых крыніц па гісторыі Беларусі.