ДАВЫД-ГАРАДОЦКІЯ КУФРЫ — вырабы народных майстроў з г.Давыд-Гарадок і навакольных вёсак Столінскага раёна. Промысел быў пашыраны ў 19 — 1-й палове 20 ст. Паводле канструкцыі куфар — завужаная к нізу дашчаная скрыня на 4 металічных ці драўляных колцах, з плоскім векам на завесах, якое выступае за бакавыя сценкі, з уразным ці накладным замком з акоўкай і 2 ручкамі па баках. Фарбавалі ў чырвона-вохрысты колер. Гладкія палосы бляхі, звычайна прафіляваныя, аздаблялі вуглы куфра, край века. Шырокія жалезныя палосы, што падзялялі плоскасць пярэдняй сценкі куфра на 4 часткі, заканчваліся дэкаратыўнымі стылізаванымі выявамі галоў птушак, змей або звычайным закругленнем. Цэнтральная палоска з адтулінай для ключа размяшчалася вертыкальна, бакавыя — з невялікім нахілам. Прамежкі паміж імі запаўняліся жалезнымі кароткімі палоскамі, накладкамі ў выглядзе 4-пялёсткавых пальметак, рэльефнымі круглымі плешкамі цвікоў.

Часам куфры аздаблялі па цэнтры пярэдняй сценкі размалёўкай расліннымі кампазіцыямі ў выглядае галінак з кветкамі. Сярод найбольш вядомых майстроў I.Дземідовіч, I.Паддубны, П.Шышко.