ДОМ ВАНЬКОВІЧАЎ.
КУЛЬТУРА I МАСТАЦТВА ПЕРШАЙ ПАЛАВІНЫ 19 СТАГОДДЗЯ — філіял
Нацыянальнага мастацкага музея Рэспублікі Беларусь. Адкрыты ў Мінску 12.05.2000 г. з нагоды 200-годдзя з дня нараджэння беларускага жывапісца, прадстаўніка рамантызму В.М.Ваньковіча ў доме, пабудаваным родам Ваньковічаў у канцы 18 ст. Дом быў уласнасцю Э.Ваньковіча, стрыечнага брата мастака. Загадчыца філіяла Н.В.Сычова.
Экспазіцыйная плошча 445 м². Прадметы інтэр'ера ў экспазіцыі музея — гадзіннік, люстры,
дываны, мэбля, фарфор — аднаўляюць звычайнае асяроддзе сядзібнага дома, атмасферу 18 — 19 ст. (інтэр'еры кабінета і параднай гасцёўні). Прадстаўлены архіўныя матэрыялы аб жыцці і творчасці мастака, палотны сучаснікаў і сяброў В.М.Ваньковіча (Я.Дамеля «Павел І вызваляе Тадэвуша Касцюшку», 1824 г.; Я.Рустэма «Партрэт Аляксандра Манюшкі», 1816 г., і інш.). Скульптура, карціны мясцовых і еўрапейскіх мастакоў дапаўняюць убранне пакояў. Прадмет асаблівага гонару музея — калекцыя сядзібнага партрэта канца 17 — сярэдзіны 19 ст., якая паказвае своеасаблівасць развіцця партрэтнага мастацтва ў Беларусі (партрэты Іераніма Хрызастома Хадкевіча, Сафіі Булгарынай, маладой жанчыны ў чорнай сукенцы).