ДУБОКСКАЯ КАПЛІЦА размяшчаецца на пагорку левага берага ракі Вілія за 0,8 км на паўночны захад ад вёскі Дубок Астравецкага раёна Гродзенскай вобласці.

Пабудавана ў першай палавіне 20 ст. з бутавага каменю каля крыніцы (лічыцца лекавай). У 1936 г. шлях да яе быў абсталяваны сям’ю прыпынкамі, прысвечанымі Божай Маці Засмучанай (так званая «Марыянская Кальварыя») і адзначанымі сакральнымі сімваламі (брама, крыж, капліца і інш.).

Капліца («Крыніца ля Багіні») вырашана ў выглядзе мураванага грота, у нішы якога пастаўлена скульптура Маці Божай.