ДУБОКСКІ КАСЦЁЛ МАЦІ БОЖАЙ НЯСТОМНАЙ ДАПАМОГІ размяшчаецца на паўднёва-ўсходняй ускраіне вёскі Дубок Астравецкага раёна Гродзенскай вобласці.

Пабудаваны ў 1928—29 гг. з дрэва. Назву «Курганскі» атрымаў з-за размяшчэння на месцы язычніцкага кургана-капішча. Побач пастаўлена двухслуповая званіца з падпісным звонам («Moj Slаsk 1934»).

Помнік народнага дойлідства. Вырашаны прамавугольным у плане двух’ярусным зрубам, накрытым паўвальмавым дахам. Уваход вылучаны двухслуповым ганкам пад пакатым шатровым гонтавым пакрыццём, над якім размешчана скульптура «Укрыжаванне». Бакавыя фасады расчлянёны «ляжачымі» вокнамі першага яруса, і прамавугольнымі — другога.