ДУБОВІК – рабочы на вялікай лодцы-дубе, што суправаджала плыты.

Калі плыт заносіла цячэннем або ён садзіўся на мель, дубовік з падначаленымі яму 7 – 8 веслярамі павінны былі адвесці яго ад небяспечнага месца. Яны адплывалі ў процілеглы ад плыта бок і кідалі ў раку якар з прывязаным да яго доўгім канатам, потым хутка вярталіся назад, замацоўвалі на плыце калаўрот ("кацярынку"), прывязвалі да яго другі канец каната і круцілі кола калаўрота. Канат накручваўся на кола, і плыт рухаўся з водмелі.