КАЛАЎРОТ, самапрадка – 1) прылада для механізаванага прадзення
лёну і
воўны ў хатніх умовах. На Беларусі вядомыя 2 тыпы калаўрота – стаяк (больш характэрны для заходніх раёнаў) і (пераважаў ва ўсходніх і паўночна-ўсходніх раёнах). Абодва тыпы мелі аднолькавыя рабочыя часткі: кола, педаль (шатун, ківач), якой кола прыводзілася ў рух, і прадзільны апарат. Апошні складаўся са стрыжня і размешчанай на ім шпулькі для намотвання пражы і маленькіх калёсікаў, злучаных пры дапамозе шнуроў з вялікім колам.
Калаўрот-стаяк. Вёска Вялікія Бортнікі Бабруйскага раёна Калаўрот-ляжак з насадной прасніцай.
Вёска Жукекічы Бераставіцкага раёна
У калаўроце-стаяку кола знаходзілася паміж дзвюма вертыкальнымі стойкамі пад прадзільным апаратам, у калаўроце-лежаку – збоку ад прадзільнага апарата. На Беларусі калаўроты з'явіліся ў XVI ст. на мануфактурных прадпрыемствах. У сялянскім побыце выкарыстоўваюцца з сярэдзіны XIX ст., асабліва ў раёнах інтэнсіўнага льнаводства на поўначы і ўсходзе Беларусі, на поўдні краіны пераважала прадзенне пры дапамозе верацяна;
2) прыстасаванне для падымання грузаў: вал з ручкай, на які намотваецца
канат, ланцуг.