ГАЛЁПЫ – рытуальнае мучное печыва з нагоды прылёту буслоў. Дзень сустрэчы птушак прыпадаў на
благавешчанне (25 сакавіка старога стылю).
Выпякалі галёпы з пшанічнай мукі ў выглядзе булачак або коржыкаў рознай формы (у залежнасці ад мясцовых звычаяў); маглі імітаваць фігуру бусла – з дзюбай, крыламі, лапамі, хвастом; яго выява магла быць выціснута на печыве зверху. Выпякаліся галёпы ў выглядзе буславай лапы або з яе адбіткам (выціскаўся трыма пальцамі); галёпы маглі мець форму сахі, бараны, сярпа і інш.
Пяклі галёпы напярэдадні або ў дзень благавешчання (калі забаранялася пячы хлеб) ці на наступны дзень. Агульнае прызначэнне печыва – сустрэча, кліканне буслоў. Галёпы раздавалі дзецям, якія выходзілі з імі на падворак, бегалі, стараючыся паказаць печыва першаму ўбачанаму буслу і пачаставаць яго. Пры гэтым прыгаворвалі: "Бусел, бусел, на табе галёпу, // Дай мне жыта кону!" або "Буську, буську, на тобі борону, // Дай мне жыта сторону! Буську, буську, на тобі сырпа, // Дай мне жыта снопа!". Часам печыва проста пакідалі на двары, каб ім пачаставаўся бусел. Астатнія галёпы дзеці елі самі.
Галёпы вядомы таксама на Заходнім Палессі (
Кобрынскі, Маларыцкі,
Драгічынскі, Іванаўскі раёны). На Гродзеншчыне, Піншчыне на благавешчанне пяклі коржыкі ("падпалкі") у форме буславай лапы ("буськавы лапы", "бусловы лапы"), на Навагрудчыне – круглыя невялікія пампушкі.