ГРУЦА – 1) Абтоўчаны ячмень, ячныя крупы. Ячмень сушылі, таўклі ў ступе, паліваючы вадой, каб адстала шалупінне, потым ачышчалі веяннем (палалі). З груцы варылі кашу, суп, на каляды – куццю.

2) Каша з абтоўчанага ячменю ці яічных круп. Лакальная назва гушча. Варылі густою (Віцебшчына, Гродзеншчына, некаторыя раёны Магілёўшчыны, Усходняе Палессе) і рэдкаватаю, часам з фасоляй (Магілёўшчына, Гомельшчына, цэнтральныя і іншыя раёны Усходняга Палесся). Рэдкую груцу варылі з мясам або на малацэ.