КАВАЛЕЎСКАЯ Софія (1853 г., в.Малыя Бакшты Маладзечанскага р-на – 2.02.1918 г.) – беларуская фалькларыстка, этнограф, пісьменніца. Вывучала духоўную і матэрыяльную культуру беларусаў, сабрала калекцыю прадметаў народных рамёстваў, твораў мастацтва, а таксама – матэрыялы пра паўстанне 1863 – 1864 гг. на Міншчыне. Гэтай жа тэме прысвяціла шэраг артыкулаў («Адзін з многіх», 1908 г.; «1863 на Міншчыне», 1917 г.) і кнігу «З успамінаў выгнанца 1863 года» (1911).

Аўтар працы «Вясельная ўрачыстасць у Вілейскім павеце ў ваколіцах Маладзечна і Радашковіч» («Wisla» – «Вісла», 1910 г.), дзе разам з апісаннем абраду прывяла ўзоры вусна-паэтычнай творчасці. Выдала кнігу ўспамінаў выкладчыка Мінскай гімназіі Ф.Шаблоўскага «Мінскія абразкі 1850 – 1863 гг.» (1912) пра гісторыю гімназіі, тэатр, сям'ю В.Дуніна-Марцінкевіча, памятныя мясціны горада.