КЛІМАВІЦКІ КРАЯЗНАЎЧЫ МУЗЕЙ створаны ў г.
Клімавічы паводле рашэння ЦК КПБ ад 11.07.1978 г. Для наведвальнікаў адкрыты 24.07.1984 г. З 1979 г. музеем кіраваў І.М. Сімакоў. З 1995 г. дырэктар Л.М. Андрушкова.
Асноўны фонд музея (2008) налічвае 5849 адзінак захоўвання, навукова-дапаможны — 7782 адзінкі. Плошча экспазіцыйных памяшканняў 222 м², выставачнай залы — 60 м².
Найбольш цікавыя прадметы з калекцый музея: бівень маманта, каменныя прылады працы 3—2-га тыс. да н.э., кнігі «Трэбнік» і «Мінеі» 2-й палавіны ХІХ в., прадметы нумізматыкі, ткацтва, народнага побыту, узоры зброі, матэрыялы пра клімавіцкія мужчынскую і жаночую гімназіі пачатку ХХ ст., творы выяўленчага мастацтва. Экспазіцыя музея, размешчаная ў 6 залах, складаецца з раздзелаў: «Прырода раёна», «Далёкае мінулае», «Сацыялістычная рэвалюцыя», «
Вялікая Айчынная вайна», «Прамысловасць раёна», «Знакамітыя землякі».
У музеі праводзяцца лекцыі на краязнаўчую тэматыку, экскурсіі, сустрэчы, выстаўкі, музейныя заняткі, гульнёвыя праграмы для дзяцей і школьнікаў. Падрыхтаваны і праведзены выстаўкі мастакоў Клімаўшчыны «Мастацкае асарці», работ навучэнцаў дзіцячай мастацкай школы «Запалі сваю зорку», абразоў «Лікі святых», этнаграфічная «З бабулінага куфэрка» і інш.
З 1996 г. на базе музея дзейнічаюць клуб «Ветэран» і аб'яднанне краязнаўцаў «Спадчына».
Адрас: 213600, г.Клімавічы, вул.Савецкая, 69
Тэл.: +375-2244-534-53; +375-2244-518-65