КУЛЕШ Даніла – беларускі казачнік канца ХІХ – пачатку ХХст. з в.
Чудзін Слуцкага павета. Ад яго запісаў фальклорныя творы
Аляксандр Казіміравіч Сержпутоўскі.
Збіральнік апублікаваў дзве ягоныя казкі ў зборніку «Казкі і апавяданні беларусаў-палешукоў» (1911) і шаснаццаць казак і легендаў у зборніку «Казкі і апавяданні беларусаў з Слуцкага павета» (1926), у прадмове да якога ахарактарызаваў Данілу Кулеша як «вельмі харошага баечніка».
У ягоным рэпертуары пераважалі сацыяльна-побытавыя казкі з вострым сатырычным зместам, дзе высмейваліся людскія заганы: скупасць, хцівасць, гультайства. У іх адлюстраваная сацыяльная несправядлівасць, раскрываюцца ўзаеміны паміж беднымі і багатымі («Праўда і Крыўда»), ставяцца філасофскія праблемы («Два камені»). Пытанні дабра і справядлівасці вырашаюцца Данілам Кулешам у духу хрысціянскай маралі.