КУРГАН СЛАВЫ САВЕЦКАЙ АРМІІ – ВЫЗВАЛІЦЕЛЬНІЦЫ БЕЛАРУСІ – мемарыяльны комплекс у гонар подзвігу воінаў 1-га, 2-га, 3-га Беларускага і 1-га Прыбалтыйскага франтоў у Беларускай аперацыі 1944 г. у
Вялікую Айчынную вайну. Знаходзіцца на 21-м кіламетры шашы Мінск — Масква. Закладзены 30.09.1966, адкрыты 05.07.1969 г. З'яўляўся філіялам
Беларускага дзяржаўнага музея гісторыі Вялікай Айчыннай вайны, з 1995 г. філіял
мемарыяльнага комплекса «Хатынь». Аўтары: скульптары А.Бембель, А.Арцімовіч, архітэктары А.Стаховіч, Л.Міцкевіч.
Помнік уяўляе сабой насыпны ўзгорак канічнай формы вышынёй 35 м. Каля падножжа кургана і на схіле ўстаноўлены гранітныя пліты з інфармацыйным тэкстам. На вяршыні ўзгорка ўзведзены 4 штыкі-абеліскі вышынёй 35,6 м — сімвалы франтоў, на якіх ішло наступленне савецкіх войск. Аснову штыкоў абкружае шырокае каменнае кальцо, унутры якога мазаічныя выявы ордэнаў Айчыннай вайны і Славы і тэкст «Арміі Савецкай, Арміі-вызваліцельніцы — слава!». На вонкавым баку змешчаны барэльефныя абагульненыя выявы — твары воінаў усіх родаў войск і партызан. Узгорак апярэзваюць дзве бетонныя лесвіцы, якія вядуць на аглядную пляцоўку.
Каля падножжа кургана праводзяцца цырымоніі прыняцця прысягі ваеннаслужачымі, урачыстыя сустрэчы ветэранаў і іншыя мерапрыемствы. Вакол мемарыяла размешчаны парк і ваенная тэхніка каля яго.
Адрас: 222201, Смалявіцкі раён
Тэл.: +375-17-507-10-76