МAKMIЛІН (McMillin) Арнольд Барат (нарадзіўся 21.06.1941, г.Ньюкасл-Элен-Тайн, Вялікабрытанія) – англійскі славіст. Доктар славянскай філалогіі (1971 г.). Скончыў Лонданскі ўніверсітэт (1964 г.). З 1965 г. выкладчык рускай мовы і літаратуры ў Школе славянскай і ўсходне-еўрапейскай моваў пры Лонданскім універсітэце, з 1976 г. прафесар, загадчык аддзялення рускай філалогіі Ліверпульскага ўніверсітэта. З 1987 г. – прафесар Школы славістыкі і ўсходне-еўрапейскіх даследаванняў Лонданскага ўніверсітэту, з 1991 г. выкладае там курс лекцый «Уводзіны ў беларускую культуру: мова, літаратура, гісторыя». Аўтар даследаванняў па беларускай мове («Слоўнік беларускай літаратурнай мовы ў XIX стагоддзі», Лондан, 1973 г., і інш.), манаграфіі «Гісторыя беларускай літаратуры – ад яе вытокаў да сённяшніх дзён» (Гісен, 1977 г.)» артыкулаў «Традыцыі і наватарства ў паэзіі М.Багдановіча», «"Бандароўна" Купалы і Шаўчэнкі: да гісторыі станаўлення беларускай літаратуры пачатку XX ст.», «Вайна і мір у прозе Васіля Быкава» і інш. Даследаваў творчасць Янкі Купалы,
Якуба Коласа, Максіма Гарэцкага, Уладзіміра Дубоўкі, Язэпа Пушчы, іншых пісьменнікаў XX – пачатка XXI стст., навуковую дзейнасць Яна Чачота,
Яўхіма Карскага. Напісаў прадмову да зборніка беларускай паэзіі «Снуецца зданяў рой» (Лондан, 1982 г.). На англійскую мову пераклаў (з В.Рыч) паэму «Тарас на Парнасе» і іншыя творы беларускай літаратуры. Удзельнік міжнародных славістычных з'ездаў і канферэнцый, аўтар беларускага часопіса "Тэрмапілы" (Польшча). Віцэ-прэзідэнт Міжнароднай асацыяцыі па вывучэнні і распаўсюджванні славянскіх культураў, сябра Міжнароднага камітэта славістаў.
Аўтар англамоўных кніг «Слоўнік беларускай літаратурнай мовы XIX стагоддзя», «Гісторыя беларускай літаратуры ад яе вытокаў да нашых дзён», «Напісанае ў халодным клімаце: беларуская літаратура ад 1970-х гадоў да нашых дзён », (выйшла ў Лондане ў 2010 г.).