МАЛІНОЎШЧЫНАЎСКАЯ КАПЛІЦА размяшчаецца ў заходняй частцы вёскі Маліноўшчына Маладзечанскага раёна Мінскай вобласці. Пабудавана ў 1898 г. як родавая пахавальня ўладальнікаў сядзібы Свентаржэцкіх.

Помнік мемарыяльнай архітэктуры з элементамі архаікі. Вырашана цаглянай чатырохграннай пірамідай, гарызантальнай цягай падзелена на два ярусы. Архаічная форма збудавання мае падкрэслена масіўныя сцены, выкладзеныя неапрацаванымі глыбамі каменю-вапняку. У капліцы — жалобная зала са стральчатымі ўваходным праёмам і бакавымі аконнымі праёмамі. У сутарэннях — нішы-пахавальні. У ніжнюю частку сцен умураваны вапнавыя паліраваныя пліты з мемарыяльнымі надпісамі.