МІХАЙЛАЎ Клім — беларускі разьбяр па дрэве XVII ст. Паходзіў са Шклова. З 1654 г. (?) працаваў у Маскоўскай дзяржаве. З 1666 [1667 (?)] у Палаце разьбярных і сталярных працаў Маскоўскага Крамля, у 1681 г. узначаліў Палату. З Арсеніем Старцам і С.Зіноўевым удзельнічаў у стварэнні «іарданскай сені» (1668 г., цяпер у саборы Нараджэння Багародзіцы ў Суздалі).

У 1667 — 1668 гг. удзельнічаў у аздабленні палаца цара Аляксея Міхайлавіча ў с.Каломенскае, харомаў царэўнаў Софіі Аляксееўны і Кацярыны Аляксееўны (шафа, ківот, крэслы, куфэркі і інш.), стварэнні іканастасаў трох цэркваў у Ізмайлаве.

У 1683 — 1685 гг. група разьбяроў на чале з К.Міхайлавым стварыла клірас і 5-ярусны іканастас Смаленскага сабора Новадзявочага і іканастас царквы Данскога манастыроў у Маскве. Пры ўдзеле Міхайлава створаная драўляная разная рака цудатворцы Савы Вішэрскага (1670).