МУЗЕЙ ГІСТОРЫІ БЕЛАРУСКАГА КІНО заснаваны ў 1976 г. у Мінску пры кінастудыі «Беларусьфільм» па ініцыятыве беларускіх кінематаграфістаў. Базавая экспазіцыя створана па падставе гранта фонда Прэзідэнта Рэспублікі Беларусь па падтрымцы культуры і мастацтва за 2000 г. Адкрыты для наведвання ў студзені 2002 г. у спецыяльна рэканструяваным за кошт рэспубліканскага бюджэта будынку — помніку архітэктуры першай паловы 20 ст. З 2005 г. з'яўляецца філіялам Дзяржаўнага музея гісторыі тэатральнай і музычнай культуры Рэспублікі Беларусь.

Агульны фонд музея (2008) налічвае больш за 16 тыс. адзінак захоўвання. Плошча экспазіцыйнай залы 140 м², выставачнай — 100 м², кіназалы на 50 месц — 45 м², відэазалы на 10 месц — 15 м².

Аснову калекцыі складаюць фонды плакатаў і афіш, анімацыі, выяўленчы, прадметны, фотатэка, навуковая бібліятэка. Сярод экспанатаў музея: эскізы мастакоў кіно, кінатэхніка, касцюмы, рэквізіт, макеты і памятныя знакі. У навуковай бібліятэцы захоўваюцца сцэнарыі фільмаў, мантажныя лісты, даведачная літаратура і рэдкія кнігі па кіно.

У музеі дзейнічае пастаянная экспазіцыя «Беларускі кінематограф як нацыянальны набытак», дзе прадстаўлены разнастайныя матэрыялы пра творчасць рэжысёраў Ю.Тарыча і У.Корш-Сабліна, лепшыя беларускія фільмы за 85 гадоў існавання кінавытворчасці на тэрыторыі Беларусі. Яе раздзелы «Заснавальнікі беларускага кіно» і «Залаты фонд беларускага кіно» дапаўняюцца тэматычнымі і персанальнымі выстаўкамі, якія знаёмяць з кінематаграфічнымі прафесіямі, гісторыяй стварэння этапных для беларускага кіно фільмаў розных відаў і жанраў, творчасцю асобных кінамайстроў. У відэазале рэгулярна дэманструецца айчынная і замежная кінакласіка.