НЕГЛЮБСКІЯ РУЧНІКІ — традыцыйныя тканыя ручнікі, якія вырабляюць ткачыхі в. Неглюбка і навакольных вёсак
Веткаўскага раёна. Вядомы з сярэдзіны 19 ст.
Ткуць з ільняных, баваўняных нітак, часам з дадаткам мулінэ, шоўку, ірысу, даўжыня ручніка 350 — 500 см, шырыня 40 — 50 см, арнамент 80—140 см на кожным канцы (да 1950-х г. памеры ручнікоў былі значна меншымі). Пераважае геаметрычны і геаметрычна-раслінны
арнамент (мясцовыя назвы «крывулі», «павукі», «кучараўкі», «казельчыкі», «лісты», «зорачка», «елкі» і інш.). Узор, змешчаны на канцах ручнікоў, складаецца з 5 — 9 шырокіх гарызантальных арнаментальных палос (2 — 4 розных узораў), далей шырокая іншага характару, потым сіметрычна паўтараюцца першыя. Сярэдзіна ручніка запаўняецца рытмічна размешчанымі вузкімі каляровымі палоскамі. Канец з трох бакоў абшываюць кароценькімі ў колер закладак мохрыкамі, часам аздабляюць вязанымі
карункамі. Пераважаюць чырвоны, чорны і белы колеры (у апошні час трапляюцца зялёны, сіні, жоўты і інш.).