ПАНАЖЫ — састаўная частка кроснаў, што служыць для прывядзення ў рух нітоў. У канцы XIX — пачатку XX ст. на тэрыторыі Беларусі пашыраныя два тыпы панажоў. Найбольш старажытныя — круглыя палкі даўжынёю 70 — 80 см, што гарызантальна падвешвалі пад нітамі (уласцівыя паўднёваму ўсходу).

Больш пашыраныя панажы ў выглядзе дошчачак шырынёю 8 — 12 см. Пры дапамозе шнуркоў панажы з аднаго боку злучаліся з нітамі і былі крыху прыўзнятыя, а з другога мацаваліся нерухома. Ніты прыходзілі ў рух ад пераменнага націскання панажоў нагамі.