ПАПЛАВОК — частка рыбалоўнай прылады, што прымацоўваецца да верхняй вяроўкі сеткавых снасцей або лескі вудаў для ўтрымання іх на плаву ці на патрэбнай глыбіні. На Паазер'і называлі таксама берасцянка, трубка, на Палессі — поплаў, плавец, плавок, корак, жмака.

Для сетак і невадоў паплавок выраблялі пераважна з бяросты: яе скручвалі ў трубку і замацоўвалі драўлянымі цвікамі. Праз сярэдзіну трубкі працягвалі вяроўку. Паплавок рабілі часам з лёгкіх пародаў дрэва (ліпы, асіны, вярбы), кары хвоі, чароту. Вудачныя паплаўкі часцей выраблялі з птушынага пер'я (пераважна гусінага), радзей — з хваёвай кары, коркаў. Для абазначэння месца, дзе ставілі перамёты і стаўныя сеткі, як паплавок выкарыстоўвалі галінкі, трысцё.

У наш час для сетак і невадоў робяць пенапластавыя паплаўкі, для вудачных побач з сінтэтычнымі матэрыяламі ўжываюць і традыцыйныя — гусінае пер'е, кару.