Палявыя работы былі ўжо завершаныя і галоўную ролю набывала малацьба, нарыхтоўка дроваў жаночая хатняя праца. У гэты час царква забараняла гульні, забавы, спраўляць
вяселлі і гэтак далей. У Піліпаўку доўгімі зімовымі вечарамі рабілі і пралі кудзелю. На вячорках спявалі паставыя песні, для якіх характэрная сур'ёзная тэматыка, апавядальная ці дыялагічная форма і пераважна мінорны характар напеву. Асноўная тэматыка піліпаўскіх песень — хатняя жаночая праца, гаротнае сямейнае жыццё жанчыны-сялянкі, нядобразычлівасць з боку сваякоў мужа, нялюбы муж, муж-п'яніца, смутак, туга па родным доме. Нязначнае месца сярод іх займалі песні жартоўнага зместу, у некаторых гучалі любоўныя матывы. Сустракаюцца песні баладнага зместу. Посная
куцця спраўлялася ў канцы Піліпаўкі.
