«ВІСЛА» («Wisla») – польскі краязнаўча-этнаграфічны ілюстраваны часопіс. Орган польскага этналагічнага таварыства. Выходзіў у Варшаве ў 1887 — 1905 гг., 1916-17 гг., 1922 г. (усяго 21 т.).

Прызначаўся этнографам, фалькларыстам, антраполагам, географам і шырокаму колу чытачоў. Заснавальнік і рэдактар у 1888-99 гг. Я.Карловіч. Друкаваў матэрыялы па этнаграфіі, фальклору, антрапалогіі, геаграфіі, народнай медыцыне і інш., справаздачы, рэцэнзіі, пераклады, польскую і замежную бібліяграфію, карэспандэнцыі. Змяшчаў артыкулы па духоўнай і матэрыяльнай культуры беларусаў: «Падарожжа Нёманам» З.Глогера (т.2, 1888 г.), «Людзі і кветкі на берагах Нёмана» Э.Ажэшкі (т.2, 1888 г.; т. 4-5, 1890-91 гг.), «Дажынкі на Літве» Біруты (А.Даравінскай, т.3, 1889 г.), «Вёска Камаровічы ў Мазырскім павеце» Э.Яленскай (т.5, 1891 г.), «З жыцця беларускага люду» А.Лантоўскага (т.9, 1895 г.), «Народныя павер'і ў ваколіцах Крывіч у Вілейскім павеце» Я.Кібарта (т.13, 1899 г.), «Святкаванне вяселля ў Вілейскім павеце ў ваколіцы Маладзечна і Радашковіч» С.Кавалеўскай (т.14, 1900 г.), «Батлейкі» ў Лідскім павеце Віленскай губерні» Е.Іваноўскага (т.15, 1901 г.). А.Ф.Літвіновіч.