«Прыадхінуты небасхіл» пабачыў свет са старымі і новымі вершамі паэта ўраджэнца вёскі Чудзін Алеся Каско. Пад такою назваю выйшаў ягоны новы зборнік вершаў.

Перш за ўсё Алесь Каско называе гэтае выданне духоўна-асветніцкім, паколькі вершы – гэта адлюстраванне душы чалавека, яго духоўнае насычанне.

Алесь Каско распавёў перадгісторыю зборніка вершаў:
- Гэта не мая была ініцыятыва. Мяне знайшоў мой зямляк, паэт Яўген Сергіеня. Пазнаёміўшыся з многімі маімі кнігамі, ён захацеў, каб я падрыхтаваў невялічкі зборнік адпаведнай тэматыкі. Хрысціянская тэматыка – гэта адна з тых сіл, якія супрацьстаяць бездухоўнасці, якая запаланіла нашу эстраду, тэлебачанне, радыё. Сапраўдная паэзія з'яўляецца духоўнанасычанай. І той паэт, які піша проста пра прыроду, хараство свету, ужо піша духоўную паэзію.

Алесь Каско падкрэсліў, што гэты зборнік адрозніваецца ад іншых сваёю светлаю накіраванасцю думак у вершах і добрым настроем.

Аліса Поль, Радыё Рацыя