«АТЭНЭЎМ» («Athenaeum») — часопіс на польскай мове, які выдаваў у 1841-51 гг. у Вільні польскі пісьменнік Ю.I.Крашэўскі. Асвятляў праблемы гісторыі, культуры, грамадска-палітычнага жыцця, галоўным чынам зямель
Вялікага княства Літоўскага — Беларусі, Літвы.
Найбольшы грамадскі рэзананс меў у 1842-48 гг., калі на яго старонках змяшчаліся матэрыялы, аўтары якіх выступалі супраць феадальных парадкаў, за вызваленне сялян ад прыгону («Аб польскім селяніне» А.Козьмяна, «Гісторыя Саўкі» Крашэўскага). Друкаваў фальклорныя і этнаграфічныя матэрыялы, у тым ліку з Беларусі: «Народныя песні, сабраныя на Піншчыне і перакладзеныя Р.Зянькевічам» (1847 г., т. 4), «Матэрыялы да статыстыкі і этнаграфіі Гродзенскай губерні. Бельскі павет» I.Ярашэвіча (1848 г., т. 6, шмат звестак пра заняткі, жыллё,
адзенне,
ежу, вуснапаэтычную творчасць беларусаў) і інш.