ДЗІТВЕНСКАЯ КАПЛІЦА СВЯТЫХ АПОСТАЛАЎ ПЯТРА І ПАЎЛА размяшчаецца ў вёсцы Дзітва Лідскага раёна Гродзенскай вобласці. Пабудавана ў пачатку 21 ст. з цэглы.

Вырашана прамавугольным у плане аб'ёмам пад двухсхільным дахам, завершаным над фасадам драўлянай чатырохграннай шатровай званічкай. Франтальны фасад сіметрычна расчлянёны арачным уваходным парталам і бакавымі арачнымі нішамі-экседрамі. Бакавыя плоскасныя фасады рытмічна расчлянёны арачнымі аконнымі праёмамі. Да алтарнай часткі далучаны нізкія прамавугольныя сакрысціі пад аднасхільнымі пакрыццямі. Унутры малітоўная зала пазбаўлена архітэктурных краповак, перакрыта плоскай столлю. Пры ўваходзе на дзвух слупах галерэя хораў.