ГРУЗДАЎСКІ КАСЦЁЛ УЗВЫШЭННЯ СВЯТОГА КРЫЖА размяшчаецца ў цэнтры вёскі Груздава Пастаўскага раёна Віцебскай вобласці. Учынены ў 2001 г. ў перабудаваным адміністрацыйным будынку другой палавіны 20 ст., узведзеным на месцы папярэдняга касцёла, спаленага ў Вялікую Айчынную вайну.

Вырашаны прамавугольным у плане будынкам пад двухсхільным дахам, завершаным над тарцовым фасадам васьміграннай шатровай сігнатуркай. Уваход вырашаны квадратным у плане прытворам, двухсхільнае пакрыццё якога таксама завершана васьміграннай шатровай вежачкай. Фасады расчлянёны прамавугольнымі аконнымі праёмамі.

Паводле падання папярэдні касцёл быў заснаваны вялікім князем літоўскім Жыгімонтам. На мяжы 19—20 ст. быў пабудаваны драўляны манументальны храм, вядомы па фотаздымку Я.Балзункевіча 1910—14 гг. З'яўляўся творам архітэктуры гістарызму. Быў вырашаны па тыпу трохнефавай двухвежавай базілікі. Сілуэт плоскаснага гарызантальна ашаляванага фасада фарміравалі трохвугольны франтон і бакавыя трох'ярусныя трохгранныя вежы са спічастымі шатрамі.