КАРЭВІЦКАЯ КАПЛІЦА размяшчаецца ў цэнтры вёскі Карэвічы Свіслацкага раёна Гродзенскай вобласці. Пабудавана ў першай палавіне 20 ст. з цэглы. Адноўлена ў 1942 г. і 1990-я гг.

Вырашана прамавугольным у плане аб'ёмам пад двухсхільным дахам са слыхавымі акенцамі, да якога далучана ніжэйшая пяцігранная апсіда пад гранёным вальмавым пакрыццём. Плоскасны фасад завершаны франтонам з увагнутымі гранямі, прарэзаны па цэнтры прамавугольным уваходным праёмам, фланкіраваны наверсе маленькімі прамавугольнымі акенцамі, адмежаваны ад плоскасці фасада тонкапрафіляваным карнізам. Бакавыя плоскасныя фасады рытмічна расчлянёны прамавугольнымі аконнымі праёмамі.