КАЗЛОЎШЧЫНАЎСКАЯ КАПЛІЦА СВЯТОГА АПОСТАЛА ПЯТРА размяшчаецца на могілках у вёсцы Казлоўшчына Пастаўскага раёна Віцебскай вобласці. Пабудавана ў першай палавіне 19 ст. з бутавага каменю.

Помнік архітэктуры позняга класіцызму. Вырашана прамавугольным у плане аб'ёмам пад двухсхільным дахам, завершаным над фасадным трохвугольным франтонам маленькай сігнатуркай. На маляўнічым паліхромным фоне бутавай муроўкі сцен кантрастна вылучаны атынкаваныя і пабеленыя элементы архітэктурнай пластыкі: трохвугольны сандрык прамавугольнага ўваходнага партала, ліштвы аконных праёмаў, карнізныя паясы.