КОПЫСКАЯ КЕРАМІКА — ганчарныя вырабы XVI — ХХ ст. з г.п.Копысь (Аршанскі раён). У XVI — XVIII ст. выраблялі гаспадарчы посуд, кафлю. У XV — XVII ст. была пашырана тэракотавая і паліваная (зялёнага колеру) кафля з рэльефным раслінным, геаметрычным і геральдычным дэкорам. У 2-й палове XVII ст. выхадцы з Копысі Я.Андрэеў, С.Аляксееў, П.Будкееў, П.Фёдараў аздаблялі паліхромнай кафляй будынкі Масквы і яе ваколіц. Асаблівага развіцця Копыская кераміка дасягнула ў ХІХ — першай палове ХХ ст.

У Копысі працавала каля 20 ганчарных заводаў, дзе выраблялі кафлю, а таксама белагліняны паліваны посуд (збанкі, гаршкі, слоікі, міскі і інш.) мяккіх акруглых форм. Вырабы аздаблялі прамымі і хвалістымі ціснёнымі паяскамі на плечыках пасудзін, налепамі, зашчыпамі па краях, падцёкамі карычневай або зялёнай палівы. Выраблялі таксама талеркі, вазы, кубкі, хлебніцы, фігурамі львоў, мядзведзяў і інш., якія ўпрыгожвалі рэльефным раслінным і анімалістычным дэкорам, пажадальнымі надпісамі, пакрывалі разнаколернай палівай. Кафлю аздаблялі рэльефным паліхромным дэкорам расліннага характару, вырашаным у стылі мадэрн. У 1920-30-я г. была пашырана вытворчасць дробнай пластыкі сюжэтна-тэматычнага характару.