ЛАПУШНІНСКАЯ КАПЛІЦА СВЯТОЙ ТЭРЭЗЫГалоўная »
ЛАПУШНІНСКАЯ КАПЛІЦА СВЯТОЙ ТЭРЭЗЫ размяшчаецца на могілках у вёсцы Лапушна Дзятлаўскага раёна Гродзенскай вобласці. Пабудавана ў 1908 г. з цэглы як родавая пахавальня ўладальнікаў маёнтка, якія мелі тут палацава-паркавы комплекс. Адноўлена ў 1994 г. Пастаўленая на высокім стромкім узгорку, яна мае выгляд антычнага храма.
Помнік архітэктуры неакласіцызму. Прамавугольнае ў плане кампактнае збудаванне накрыта двухсхільным дахам. Галоўны фасад вылучаны чатырохкалонным дарычным порцікам. Сцены рытмічна раскрапаваны лапаткамі, прамавугольнымі аконнымі праёмамі, дэкарыраванымі сандрыкамі. Уваход аформлены прамавугольным парталам з трохвугольным франтонам.
Зала перакрыта плоскай столлю па бэльках, скрыжаванні якіх утвараюць нішы-кесоны, аздобленыя накладнымі дэкаратыўнымі разеткамі. Над уваходам — балкон хораў з вінтавой металічнай лесвіцай. Падлога мазаічная з керамічнай пліткі. Ніжняя частка сцен абліцавана драўлянымі панэлямі.
Крыніца: Кулагін А. М. Каталіцкія храмы Беларусі: Энцыкл. даведнік / А. М. Кулагін; фатограф А. Л. Дыбоўскі. — 2-е выд. — Мн.: БелЭн, 2008. — 488 с.: іл.
|