МАШТАРНЯ (ад польск. masztalerz канюшы, старшы конюх) — назва жытла конюхаў у панскіх сядзібах 16 — 19 ст. або невялікай майстэрні па рамонту экіпажаў і вазоў, а таксама каморы пры стайні.

Як жылыя збудаванні маштарні ўяўлялі сабой традыцыйнае народнае жыллё (1-, 2- і 3-камернае), часам з прыбудаванымі пры жылых памяшканнях гаспадарчымі каморамі. Жылыя памяшканні мелі 2 — 4 акны, глінабітныя курныя печы або кафляныя печкі-грубкі, сталы, лавы і іншае традыцыйнае начынне.

Нярэдка маштарні прыбудоўвалі да тарцоў стайняў, часам будавалі ў 2 паверхі, у якіх размяшчаліся жылыя і гаспадарчыя памяшканні.