МАСТОЎСКІ КАСЦЁЛ МАЦІ БОЖАЙ ТРОЙЧЫ ЦУДОЎНАЙ размяшчаецца ў горадзе Масты Гродзенскай вобласці. Пабудаваны ў канцы 1992—97 гг. з цэглы (будаўніцтва пачата 06.04.1992 г.) паводле праекта архітэктараў А.Штэна, І.Казлоўскага, Т.Чорнай, С.Мужэйка.

Вырашаны прамавугольным у плане аб'ёмам, да якога далучаны пяцігранная апсіда з бакавымі нізкімі сакрысціямі і вузкі нартэкс з боку фасада. Стракаты сілуэт храма ствараюць зграбныя сігнатуркі са спічастымі шпілямі па цэнтры і бабках фасада і ў канцы двухсхільнага даху. Вось сіметрыі фасада адзначана прамавугольным уваходным парталам і высокім аконным прамавугольным праёмам над ім, над якім навісае двухгранны эркер. Бакавыя фасады рытмічна расчлянёны арачнымі аконнымі праёмамі і лапаткамі ў прасценках.