МІЛАВІДСКАЯ КАПЛІЦА размяшчаецца за 5 км на захад ад вёскі Мілавіды Баранавіцкага раёна Брэсцкай вобласці каля шашы Івацэвічы — Слуцк, недалёка ад вёскі Каўпакі. Пастаўлена ў 1930—33 гг. з цэглы на месцы адной з буйнейшых бітваў падчас паўстання 1863—64 гг.

Прамавугольны ўчастак помніка акаймаваны нізкімі гранёнымі слупамі. У 1988 г. непадалёк устаноўлены памятны знак. На месцы пахавання рускіх вайскоўцаў пастаўлены чыгунны крыж на пастаменце.

Помнік мемарыяльнай архітэктуры неакласіцызму. Вырашана ўзнесенай на квадратны пастамент чатырохграннай ратондай, накрытай пакатым васьмігранным дашкам (раней гранёным сферычным купалам) з каваным крыжом у завяршэнні. Грані прарэзаны арачнымі прасветамі з архівольтамі, крапаваны вуглавымі паўкалонамі,якія нясуць шырокі антаблемент. У прамавугольным плакетках цокаля — памятныя надпісы.