МСЦІЖСКАЕ ЕВАНГЕЛЛЕ — рукапісны помнік XIII — XIV стст. Напісаны царкоўна-славянскай мовай уставам у 2 слупкі, на 187 пергаментных аркушах. Уключае пачаткі тэкстаў Евангелляў ад Іаана, Мацвея, Лукі, чытанні ад Марка, Лукі і Іаана (уперамежку), саборнік (паказальнік евангельскіх чытанняў на святах). На палях зробленыя надпісы XVI ст.: зачыны асобных Евангелляў і інш.

У Мсціжскім Евангеллі змешчаныя 1 застаўка і блізу 350 ініцыялаў, выкананых пераважна ў тэраталагічным стылі (яму характэрныя стылізаваныя выявы казачных звяроў і птушак, дзівосна пераплеценых рамянямі). Асобныя ініцыялы маюць жанравы характар. На адным з іх (літара «В») адлюстраваны селянін з рыдлёўкай (адна з першых выяваў працы ў беларускім мастацтве). Аздобы выкананыя 4 колерамі: сінім, чыроным, зялёным, жоўтым. На срэбных пласцінах скуранога пераплёту выгравіраваныя выявы евангелістаў і Ісуса Хрыста на крыжы.

Мяркуюць, што Мсціжскае Евангелле прывезенае ў Беларусь з цяперашніх рускіх земляў. На 1-й і апошняй старонках у XVI ст. зроблены запіс, што мінскі бурмістр Васіль Лax ахвяраваў гэты асобнік царкве Святога Юрыя ў Мсціжы (Барысаўскі раён). Зберагаецца ў бібліятэцы Акадэміі навук Літоўскай Рэспублікі.