МУЗЕЙ ГІСТОРЫІ ГОРАДА МІНСКА створаны рашэннем Мінскага гарадскога выканаўчага камітэта ад 08.04.2010 г. Размешчаны музей у гістарычным цэнтры Мінска на тэрыторыі Верхняга горада. Будынак з’яўляецца помнікам архітэктуры XIX ст. Для наведвальнікаў музей адчыніў свае дзверы 8 мая 2010 г. экспазіцыяй "Мастак. Грамадзянін. Герой", прысвечанай Герою Беларусі, народнаму мастаку Беларусі, Ганароваму грамадзяніну горада Мінска Міхаілу Андрэевічу Савіцкаму.

Фонды музея ўключаюць больш за 7 тысяч адзінак захоўвання. Іх аснову складаюць калекцыі археалагічных раскопак Мінска XI — XIX стст., прадметаў побыту, фотаапаратаў канца XIX — XX стст., жывапісу, графікі, дэкаратыўна-прыкладнога мастацтва, мемарыяльныя зборы знакамітых асоб.

У структуру музея ўваходзяць: Мінская гарадская ратуша (пл.Свабоды, 2а), Мастацкая галерэя Міхаіла Савіцкага (пл.Свабоды, 15), Гарадская мастацкая галерэя твораў Л.Д. Шчамялёва (пр.Ракасоўскага, 49), Майстэрня-музей народнага мастака Беларусі скульптара Івана Міско (вул.Інтэрнацыянальная, 11а), Флігель Лошыцкага сядзібна-паркавага комплексу (праезд Чыжэўскіх, 10).

У музеі арганізуюцца зменныя тэматычныя выставы, у тым ліку міжнародныя, на аснове збораў калекцыянераў, мастакоў, фатографаў, розных арганізацый і ўстаноў, а таксама ладзяцца разнастайныя творчыя праекты: канцэрты, семінары, канферэнцыі, акцыі, пленэры.

З моманту адкрыцця Музей гісторыі горада Мінска і яго філіялы наведалі больш за 40 тысяч чалавек.

Крыніца: Першы нацыянальны форум "Музеі Беларусі". Каталог музеяў.