МУЗЕЙ ПРЫРОДЫ БЯРЭЗІНСКАГА БІЯСФЕРНАГА ЗАПАВЕДНІКА заснаваны вясной 1940 г. пры Бярэзінскім запаведніку ў в.Крайцы Лепельскага раёна. У час Вялікай Айчыннай вайны ўся маёмасць, архіўныя дадзеныя і будынак музея былі знішчаны нямецка-фашысцкімі захопнікамі. У 1949 г. зноў адкрыты для наведвальнікаў. У 1951 г. Бярэзінскі запаведнік ліквідаваны, усе калекцыйныя фонды музея перададзены Беларускаму дзяржаўнаму універсітэту. У 1959 г. запаведнік адноўлены. У студзені 1983 г. па ініцыятыве Міністэрства сельскай гаспадаркі СССР у в.Домжарыцы адкрыты музей прыроды.

Асноўны фонд (2008) налічвае 322 адзінкі захоўвання. Агульная плошча 400 м².

У экспазіцыі прадстаўлены карта з абазначэннем усіх нацыянальных паркаў і запаведнікаў Беларусі і карта Бярэзінскага біясфернага запаведніка, на якой паказаны яго асноўныя прыродныя адметнасці. Экспануюцца чучалы жывёл, птушак, рыб, рэптылій і амфібій. Выстаўлены дыярамы: «Бабры», «Рысі», «Ваўкі», «Дзік», «Мядзведзі», «Зубры», «Ласі», «Баравая дзіч», «Зімнія птушкі», «Жураўлі», «Чаплі», «Глушэц», «Лясныя птушкі» і інш.

У доме экалагічнай асветы, які знаходзіцца пры музеі, дэманструюцца кінафільмы на прыродаахоўную тэматыку.