ПАДЗОР — 1) у драўляным дойлідстве дошка з глухой, скразной або краявой разьбой, што акаймоўвае навісь даху або страхі; элемент архітэктурнага дэкору. Выкарыстоўваецца пераважна ў жыллі, некаторых гаспадарчых пабудовах, брамах і варотах, культавых збудаваннях.

Мастацкая роля падзора — стварэнне складанага малюнка святлаценю на ніжняй частцы антаблемента або верхняй частцы сцяны будынка. Ім найчасцей аздабляюдь будынкі і збудаванні з вальмавым дахам. Найбольш простыя падзоры — дошкі з краявой разьбой у выглядзе зубцоў або хвалі (у Рамельскай Міхайлаўскай царкве). Ажурная скразная разьба падзора з выкарыстаннем арнаментальных геаметрычных і раслінных матываў характэрная для жыллёвага будаўніцтва ўсходу і паўднёвага ўсходу Беларусі (жылыя дамы ў Ветцы, Гарадку, Гомелі, Мазыры і інш.);

2) у дэкаратыўна-ўжытковым мастацтве — брыжы (вузкая палоска тканіны, сабраная ў зборачкі), карункі, якімі абшываецца край прасціны, пакрывала і да т.п. На захадзе Віцебшчыны таксама называюць падузорнік.