«ПАПАРАЦЬ-КВЕТКА» — культурна-асветная арганізацыя. Існавала ў Слуцку з лютага 1917 года да 1920 года пры гімназіі. Мела літаратурную, краязнаўчую і драматычна-харавую секцыі. Кіраўнік драматычнага калектыву А.Бараноўскі. Налічвала больш за 200 удзельнікаў. Летам 1920 года з драматычным калектывам працаваў У.Галубок (як педагог і рэжысёр). Ставілася пераважна беларуская драматургія. «Папараць-кветка» мела гурткі-філіялы на Случчыне і Капыльшчыне: «Зарніца» (в.Старыца, кіраўнік А.Калпак), — «Крыніца» (в.Засялонне — Аніхоўскі), «Зорка» (в.Ліпнікі, в.Ісерна — У.Дубіна; в. Сухая Міля — М.Дубіна), школьны гурток (в.Грозаў — Пратасевіч) і іншыя.

Сярод пастановак: «Паўлінка» Янкі Купалы, «Суд», «Госць з катаргі», «Бязвінная кроў», «Душагубы» і «Апошняе спатканне» У.Галубка, «Рысь» і «Хам» паводле Э.Ажэшкі, «Модны шляхцюк» Каруся Каганца. Выконваліся вершы Янкі Купалы, Якуба Коласа, Цішкі Гартнага і іншых.