ПЛЯБАНІЯ (польск. plebania) — у Польшчы і Беларусі ў ХVІ — пачатку XX стагоддзяў двор святара каталіцкай, рэфарматарскай або ўніяцкай царквы, звычайна непадалёк храма, з жылым домам і гаспадарчымі збудаваннямі. Пераважна драўляная жылая забудова вырашалася ў традыцыях народнага дойлідства.

Планіроўка дома звычайна трохкамерная, у XIX — пачатку XX стагоддзяў больш складанай структуры. Некаторыя дамы мелі ганкі, галерэйкі, падчэні (вёска Ішкалдзь Баранавіцкага раёна). Двухпавярховая мураваная плябанія ў Мядзелі (другвя палова XIX стагоддзя) — прамавугольны ў плане будынак з жылымі і гаспадарчымі памяшканнямі. Непадалёку ад жылога дома размяшчаліся свірны, стайня, хлявы і іншыя збудаванні.