ПОГРАБ — гаспадарчая пабудова для захоўвання харчавання, пераважна караняплодаў і гародніны. Яма з крытым верхам і сценамі з бярвення. Іншыя назвы склеп, лёх; піўніца — від пограба для захавання віна, піва, квасу, соку, настойкі, малака, гародніны, садавіны і іншых прадуктаў.

Як яма ў зямлі вядомы з глыбокай старажытнасці; у пісьмовых крыніцах упершыню згадваецца ў 1067 годзе ў «Аповесці мінулых гадоў». Пограб сучаснага варыянту выяўлены пад час раскопак Полацкага Верхняга замка (зруб 0,8 х 1,2 метраў; канец XIV—XVII стагоддзяў), Віцебскага Ніжняга замка (зруб 1 х 1 метра; канец XVI стагоддзя).