РАГОТНЕНСКІ КАСЦЁЛ АНЁЛАЎ-АХОЎНІКАЎ размяшчаецца ва ўсходняй частцы вёскі Раготна Дзятлаўскага раёна Гродзенскай вобласці. Пабудаваны ў 1840 годзе з цэглы. Пасля 1866 года пераабсталяваны пад Ражджаства-Багародзіцкую царкву. У 1920-я гады вернуты католікам, у 1947 годзе закрыты. Зноў асвячоны ў 1989 годзе. На 1997 год налічвалася 845 парафіян.

Помнік архітэктуры позняга класіцызму. Вырашаны магутным прамавугольным у плане аб'ёмам пад двухсхільным дахам. Фасад адзначаны буйнамаштабным шасцікалонным порцікам з вялізным антаблементам, над якім узвышаюцца бакавыя чацверыковыя вежы-званіцы і трохвугольны франтон паміж імі. Бакавыя фасады члянёны прамавугольнымі аконнымі праёмамі і пілястрамі ў прасценках.