ВЕЧАРЫНКА, вечарына – даўні звычай сялянскай моладзі збірацца вечарамі, асабліва ў нядзелю ці свята, на танцы і гульні. Лакальная назва забава. Наладжвалі пераважна зімой у прасторнай хаце або карчме. У грамадскім побыце старадаўняй вёскі — найбольш даступная магчымасць сустрэч моладзі. Бытавалі вечарынкі і ў гарадскім асяроддзі. У пачатку 20 ст. ў гарадах і мястэчках вечарынкі выкарыстоўвалі аматарскія гурткі для папулярызацыі беларускай літаратуры і мастацтва (т.зв. беларускія вечарынкі). Глядзіце таксама Ігрышча.