ВЕТРАНІЦЫ, закрыліны – дошкі, якія закрываюць тарцы двухсхільнай страхі, радзей страхі «з прычолкам» у традыцыйнай сялянскай хаце. Лакальныя назвы: ветравыя дошкі, апухі. У некаторых мясцовасцях цераз ветраніцы прапускаюць канцы лат.

Раней ветраніцы прызначаліся для ўмацавання саламянага пакрыцця на страсе. Пазней іх сталі рабіць і пры іншых тыпах пакрыцця. Ветраніцы ахоўваюць латы і шчыт ад ападкаў. Іх вяршыні ствараюць вільчык. Традыцыйна ветраніцы ўпрыгожваюцца разьбой. На Паазер'і часцей выкарыстоўваюцца сюжэты геаметрычнага арнаменту, на Панямонні, у цэнтральных раёнах Беларусі і асабліва на Падняпроўі — больш складаныя сюжэты расліннага арнаменту і спалучэнні яго з геаметрычным. Звычайна дэкаратыўны матыў на ветраніцах і застрэшку аднолькавы, што падкрэслівае адзінства мастацкага аблічча хаты.