ЖОДЗІШСКІ КАЛЕГІУМ ЕЗУІТАЎ размяшчаецца ў паўднёвай частцы вёскі Жодзішкі Смаргонскага раёна Гродзенскай вобласці. Пабудаваны ў 1757—66 гг. з цэглы.

Помнік архітэктуры барока. Першапачаткова ўяўляў сабой трохпавярховы Ш-падобны ў плане аб'ём. Захавалася двухпавярховае пад вальмавым дахам цэнтральнае прамавугольнае ў плане крыло (таўшчыня сцен каля 1 м). Цэнтр працяглага франтальнага фасада вылучаны рызалітам з мансардай і ўваходным праёмам. Сцены расчлянёны лучковымі аконнымі праёмамі і вузкімі лапаткамі ў прасценках. Планіроўка галерэйная, памяшканні перакрыты крыжовымі скляпеннямі. У будынку мелася капліца. Адно з крылаў займала сямігадовая езуіцкая школа. У 19 ст. будынак калегіума быў прыстасаваны пад сядзібны дом, у савецкі час — пад медыцынскую ўстанову.