АДВЕДКІ — наведванне парадзіхі пасля родаў; традыцыйны звычай радзіннай абраднасці. Лакальныя назвы водведы, адведзіны, провідкі, наведы.

У адведкі ішлі звычайна жанчыны (суседкі, сяброўкі, сваячкі парадзіхі) без запрашэння ўсе разам ці паасобку ў першыя 2—3 дні (на Палессі — у два тыдні і болей) пасля родаў, каб дапамагчы парадзісе і яе сям'і ў дамашніх клопатах. Паводле норм звычаёвага права, у адведкі нельга было ісці з пустымі рукамі, таму жанчыны неслі з сабою яешню, хлеб, кашу, сыр, мёд, масла, на Палессі — яшчэ боршч, аладкі, варэнікі, сырнікі, кампот з сушаных чарніц (узвар). Мужчынам і незамужнім дзяўчатам забаранялася хадзіць у адведкі, забаронена было таксама цікавіцца здароўем нованароджанага.

На Беларусі гэты звычай захаваўся да нашага часу, асабліва сярод сельскага насельніцтва, толькі з некаторымі зменамі: у адведкі разам з жанчынамі ходзяць мужчыны і незамужнія дзяўчаты, з сабой звычайна прыносяць падарункі дзіцяці і парадзісе, кветкі і інш.