АШМЯНСКІ КРАЯЗНАЎЧЫ МУЗЕЙ імя Ф.К.Багушэвіча заснаваны ў г.
Ашмяны паводле пастановы Савета Міністраў
БССР ад 27.09.1952 г. Адкрыты для наведвальнікаў 16.10.1955 г. Плошча экспазіцыі на той час складала 144 м². Музеем кіравалі А.М.Кушнераў, В.У.Свенціхоўскі, Л.Дз.Яфімцава, М.Ф.Спірыдонаў, В.Р.Навумаў, Ю.М.Борд, М.М.Бараноўскі, А.Р.Каранеўскі, Д.І.Васілеўская. З 1998 г. дырэктар Ж.І.Іванова.
Асноўны фонд музея (2008) налічвае 9144 адзінак захоўвання, навукова-дапаможны — 9870 адзінак. У калекцыях музея старажытныя прылады працы, фрагменты шклянога і керамічнага посуду 11 — 16 ст., знойдзеныя пры археалагічных раскопках на Ашмяншчыне, манеты 18 — 19 ст., прадметы побыту, творы дэкаратыўна-прыкладнога мастацтва, вырабы народных майстроў, дакументы і фотаздымкі па гісторыі Ашмянскага краю. Экспанаты расказваюць пра ўдзельнікаў гістарычных і рэвалюцыйных падзей Н.С.Арэхву, Г.Дэмбінскага, А.Снядэцкага. У фондах музея зберагаюцца дакументы і матэрыялы перыяду
Вялікай Айчыннай вайны, у тым ліку аб партызанскай брыгадзе імя Гастэлы, якая дзейнічала на тэрыторыі раёна, друкарскі станок, партызанскія газеты і лістоўкі. Значная частка калекцыі прысвечана жыццю і творчасці
Францішака Багушэвіча: асабістыя рэчы, выданні яго твораў, макет дома ў Кушлянах і інш. У музейнай бібліятэцы захоўваецца каля 1,5 тысячы тамоў каштоўных выданняў 19 — 20 ст.
У 2000 г. музей пераведзены ў гістарычны будынак у цэнтры
горада і закрыты для наведвапьнікаў. З верасня 2006 г. вядзецца рэканструкцыя. Выставачная дзейнасць адбываецца ў навучальных установах, установах культуры, іншых музеях.
Адрас: 231100, г.Ашмяны, вул.Савецкая, 128
Тэл.: +375-1593-425-93