АСТРОЎНЕНСКІ КАСЦЁЛ (цяпер Свята-Троіцкая праваслаўная царва) размяшчаецца ў вёсцы Астроўна Бешанковіцкага раёна Віцебскай вобласці на паўднёвым беразе возера Астроўна. Пабудаваны ў 17 (па іншых звестках у 16) ст. з цэглы. У паўзруйнаваным стане.

Першы касцёл заснаваны каралём Жыгімонтам Аўгустам, які ахвяраваў яму абраз Маці Божай у каштоўнай рызе. Пасля разбурэння быў адноўлены віцебскім ваяводам Міхаілам Пацеем. Мсціслаўскі ваявода Аляксандр Сапега каля 1620 г. заснаваў пры касцёле кляштар дамініканцаў. Пасля 1863 г. касцёл забраны пад царкву, быў пераарыентаваны апсідай на ўсход і набыў рысы рэтраспектыўна-рускага стылю.

Помнік архітэктуры класіцызму з рудыментамі рэнесансу і барока. Манументальная трохнефавая базіліка са званіцай. Асноўны неф храма — прамавугольны ў плане аб'ём (таўшчыня сцен каля 1,5 м), завершаны двухсхільным дахам з тонкапрафіляваным карнізам. Архітэктура фасадаў лаканічная — магутныя сцены (таўшчыня 1 м) прарэзаны высока ўзнятымі арачнымі аконнымі праёмамі і крапаваны ў прасценках шырокімі лапаткамі. 3 заходняга боку да аб'ёму далучаюцца нартэкс і трохярусная званіца (першы ярус мае акруглы абрыс, другі — цыліндр, трэці — васьмярык). Галоўны ўваход вылучаны лучковым праёмам.

Унутры прастора храма чатырма магутнымі слупамі падзелена на тры нефы, перакрытыя крыжовымі скляпеннямі з распалубкамі і падпружнымі аркамі. Цэнтральны неф пераходзіць у прамавугольную апсіду з адкрытымі ў яе арачнымі праёмамі бакавых сакрысцій. Пры ўваходзе размешчаны хоры, на якія вядуць дзве лесвіцы ў тоўшчы бакавых сцен. Пад храмам крыпта.