КАНСТАНЦІНАЎСКІ КАСЦЁЛ СВЯТОГА ІАСАФАТА КУНЦЭВІЧА размяшчаецца ў цэнтры вёскі Канстанцінава Глыбоцкага раёна Віцебскай вобласці. Пабудаваны ў 1993—95 гг. з цэглы на месцы храма, зруйнаванага ў 1962 г. Асвячоны кардыналам К.Свёнтакам 21.11.1995 г. Каля 700 парафіян.

Вырашаны двумя прамавугольнымі ў плане пад двухсхільнымі дахамі аб'ёмамі малітоўнай залы і апсіды, да якой дабудавана сакрысція. Галоўны і тыльны фасады завершаны васьміграннымі шатровымі драўлянымі барабанамі. Плоскасныя фасады расчлянёны арачнымі аконнымі і лучковымі ўваходнымі праёмамі ў ліштвах, крапаваны вуглавымі пілястрамі.

Перад касцёлам захавалася званіца 19 ст. Васьміграннае трох'яруснае збудаванне пад шатровым пакрыццём. Першыя два ярусы мураваныя глухія, трэці драўляны, адкрыты прамавугольнымі прасветамі.