КРАСНАПОЛЬСКІ ГІСТОРЫКА-ЭТНАГРАФІЧНЫ МУЗЕЙ заснаваны ў г.п.
Краснаполле паводле рашэння Краснапольскага раённага Савета народных дэпутатаў ад 19.11.1991 г. Адкрыты для наведвальнікаў у 1994 г. у былым будынку раённага вузла сувязі. Музеем кіравалі В.М.Коршыкаў, В.І.Лазовік. З 2004 г. дырэктар А.В.Васількова.
Асноўны фонд музея (2008) налічвае 3049 адзінак захоўвання, навукова-дапаможны — 375 адзінак Агульная плошча экспазіцыі 222 м². Найбольш значныя калекцыі: нумізматыкі, фалерыстыкі, зброі, фотаздымкаў, ручнікоў, народнага адзення.
У музеі дзейнічаюць 4 экспазіцыйныя і выставачная залы. Экспазіцыя «Боль Чарнобыля» прадстаўлена фотаздымкамі і дакументамі, якія расказваюць аб ліквідацыі наступстваў катастрофы на Чарнобыльскай атамнай электрастанцыі ў Краснапольскім раёне, перасяленні жыхароў раёна з забруджаных месцаў, аб пакінутых населеных пунктах раёна, аздараўленні і адпачынку дзяцей. Змешчаны пералік адселеных вёсак Краснапольшчыны. Частку залы займае дыярама «Радаўніца», прысвечаная ўшанаванню памяці продкаў у пакінутых сёлах.
Экспазіцыя пра гісторыю Краснапольскага народнага тэатра, каля вытокаў якога стаялі літаратары В. і А.Шашалевічы, скульптар А.Грубэ, захоўвае тэатральныя афішы і ўзнагароды, фотаздымкі са сцэнамі з пастановак, расказвае аб творчасці рэжысёраў і акцёраў, якія працавалі ў тэатры, дзейнасці дзіцячай тэатральнай студыі «Арляня». Экспазіцыя этнаграфіі і побыту Краснапольшчыны канца ХІХ — пачатку ХХ ст. знаёміць з асноўнымі заняткамі насельніцтва гэтага перыяду:
ганчарствам, ткацтвам, дрэваапрацоўчымі рамёствамі.
Сярод экспанатаў: ткацкі станок, вырабы з дрэва і гліны, макет ганчарнай печы для абпальвання. Асобны раздзел экспазіцыі прысвечаны народнаму адзенню, ручнікам. У музеі адкрыта экспазіцыйная зала, прысвечаная 50-годдзю з дня Перамогі над нямецка-фашысцкімі захопнікамі. У складзе экспазіцыі раздзелы «Акупацыя раёна — рэжым насілля і здзекаў», «Партызанскі рух на Краснапольшчыне», «Вызваленне Краснапольскага раёна», «Нашы землякі на франтах
Вялікай Айчыннай вайны», а таксама дыярамы «Партызанскі лагер» і «Бой за вызваленне Краснаполля». Змешчаны партрэты 7 Герояў Савецкага Саюза — ураджэнцаў Краснапольскага раёна. Сярод экспанатаў: гільзы, шынель, гімнасцёрка, ваенныя каскі. У выставачнай зале экспануюцца калекцыі з уласных фондаў музея, творы мастакоў і народных умельцаў Краснапольшчыны, выстаўкі з фондаў
Магілёўскага гісторыка-краязнаўчага музея і раённых музеяў Магілёўскай вобласці.
Адрас: г.п.Краснаполле, вул.Антонава, 2
Тэл.: +375-2238-20-27-53