МАГІЛЁЎСКАЯ КАПЛІЦА размяшчаецца ў горадзе Магілёў на вуліцы Лазарэнкі, на каталіцкіх могілках. Пабудавана ў пачатку 20 стагоддзя з цэглы.

Помнік архітэктуры неаготыкі. Вырашана кампактным прамавугольным у плане аб'ёмам пад пакатым двухсхільным дахам. Фасад завершаны двухгранным шчытом, вылучаны па цэнтры стральчатым уваходным парталам, фланкіраваным гранёнымі пілонамі з пінаклямі. Бакавыя фасады расчлянёны стральчатымі аконнымі праёмамі, крапаваны вуглавымі лапаткамі з рэльефнымі крыжамі. Будынак апяразаны карнізам з сухарыкамі.